“Оюутолгой”-н зарим албан тушаалтнуудад хязгаарлалт тогтоов

“Оюутолгой” ХХК-ийн албан тушаалтнууд болох Д.Амартүвшин, Б.Сэрчмаа, Ч.Нэргүй, М.Ганболд нарыг албан тушаалаа урвуулсан, хахууль аван, үндэслэлгүй хөрөнгөжсөн, мөнгө угаасан хэрэгт холбогдуулан Тагнуулын ерөнхий газар (ТЕГ)-ын Мөрдөн шалгах газрын ажилтнууд шалгаж байгаа.

Дүүргийн шүүхэд Нийслэлийн прокурорын газраас яллагдагч Д.А-д эрүүгийн хэрэг хянан шийдвэрлэх ажиллагаанд саад учруулахгүй байх, дахин гэмт хэрэг үйлдэхээс урьдчилан сэргийлэх зорилгоор Эрүүгийн хэрэг хянан шийдвэрлэх тухай хуулийн 14.5 дугаар зүйлийн 1 дэх хэсэгт заасан үндэслэлээр Монгол Улсын хилээр гарахыг хязгаарлах, оршин суух хаягнаас гарахыг хязгаарлах, тодорхой хүнтэй уулзах, харилцахыг хориглох хязгаарлалт тогтоох таслан сэргийлэх арга хэмжээ авахыг санал ирүүлснийг 2025 оны 10 дугаар сарын 30-ны өдөр хүлээн авч, хянан хэлэлцэв.

Шүүх прокуророос шүүхэд танилцуулсан нотлох баримтууд, шүүхийн хэлэлцүүлэгт гаргасан прокурорын санал, яллагдагчийн өмгөөлөгчийн тайлбар зэрэгтэй танилцан прокурорын саналыг хүлээн авч, яллагдагч Д.А-д хязгаарлалт тогтоох таслан сэргийлэх арга хэмжээ авч шийдвэрлэв.