Маргааш “Алтан цом”-ын IV тойргийн барилдаан эхэлнэ

Монголын үндэсний бөхийн холбооноос зохион байгуулж буй “Алтан цом”-ын төлөөх барилдааны дөрөвдүгээр тойргийн барилдаан энэ амралтын өдрүүдэд болно. Маргааш “Хатант Интернэшнл” баг “Хүлэгү”-тэй эхний барилдааныг хийх бол “Эв Монгол” баг “АПУ Скайтел” багтай оноолт таарчээ.

Харин ням гарагт “Ми Си Эс Энержи” баг “Хамаг Монгол”-той, “Од групп” баг “Хубилай хаан”-тай барилдана.

“Алтан цом”-ын төлөөх барилдааныг улсын арслан Э.Батмагнайгаар ахлуулсан “М-Си-Эс Энержи” баг гурван ялалттай тэргүүлсэн хэвээр байгаа бол улсын арслан Б.Орхонбаяр ахлагчтай “АПУ Скайтел” баг хоёр ялалт, нэг ялагдалтай удаалж байна. Хоёр баг нийт 46 даваа авчээ. Мөн улсын аварга О.Хангайгаар ахлуулсан “Од групп”, улсын арслан Р.Пүрэвдагва ахлагчтай “Хатант интернэшнл” багууд хоёр хожил, нэг хожигдолтой жагсаалтын гурав, дөрөвт бичигдэж байна.

Харин “Эв Монгол”, “Хубилай хаан”, “Хамаг Монгол” багууд нэг хожил, хоёр хожигдолтой жагсаалтын 5-7-р байрт байгаа бол “Хүлэгү” баг нэг ч ялалтгүй хамгийн сүүлд бичигдэж байгаа юм.